ثقب الأوزون لازم نعمل حاجة علشان ننقذه

حكاوي الأستاذ غاوي فتاوي
 
حوارات باللغة المصرية العامية بطلها الأستاذ غاوي فتاوي الذي يهوى التدخل في الطب
تتناول المعتقدات الخاطئة عن أمراض الروماتيزم يليها مقال تثقيفي لتصحيح هذه المعلومات 

في هذا العدد: المعلومات الطبية في وسائل الإعلام

لا يوجد تحليل يستخدمه الأطباء لتشخيص مرض خشونة المفاصل
يعتمد تشخيص مرض خشونة المفاصل على وصف المريض للأعراض وعلى الأشعة العادية
ننصح بالتعامل مع المعلومات الطبية بوسائل الإعلام بالتأني بعض الشئ وبإستشارة طبيب إستشاري متخصص

جلس فتاوي على القهوة يتصفح جريدته ويتمعن في قراءة مقالاتها بإهتمام غير مكترث لكل أنواع الضوضاء ومصادر الإزعاج المحيطة به فقد إعتاد منذ زمن بعيد الإستمتاع بوقته في القهوة وسط أصوات الجالسين التي تتحول إلى صرخات مفاجئة بتحيتهم بعضهم لبعض أوتعلو بمناداتهم لصبي القهوة أوحتى بحديثهم العادي وإعتاد أيضاً بل صار يطرب لصوت الباعة المتجولين طوال النهار والغير متجولين ممن يبيعون الخس والجرجيروكذلك الفول النابت وحب العزيز والدوم على ناصية القهوة هذا بالإضافة طبعاً إلى تهليل الأطفال الذين يلعبون الكرة بالحارة من العصر وحتى منتصف الليل يومياً.  ولا ننسى إذا كان حديثنا عن الإزعاج صوت جهاز التلفاز بالقهوة والذي ينافس في صراعه من أجل فرض سيطرته على الجهاز السمعي المسكين لسكان الحارة إذاعة أم كلثوم المنبعثة من جهاز الراديو في دكان أبو هيثم الحلاق على الرصيف المقابل. عالم متكامل من الدمار الشامل واليومي لكل من يحلم بالهدوء في قهوة دقدق أو في حارة أم ياسين بحي الظاهربالقاهرة

دخل القهوة أربعة أشخاص متوسط أعمارهم منتصف العقد الرابع من العمر وإتخذوا مقاعدهم على الطاولة المقابلة لركن فتاوي وهم يواصلون حديثهم عن الشئ الوحيد الذي يمكن أن يستميل أذن الأستاذ فتاوي الذواقة ويجبره على الخروج من صومعته الجريدية …

طلال

والعلاج ده هو اللي إخترعه فعلاً ولا يعني هو جايبه من بره علشان يعالج بيه الناس هنا؟

سعيد

بقولك إخترعه، إخترعه. وجربه على مرضى كتير كلهم عندهم خشونة شديدة في ركبهم

حسن

بالضبط ، إحنا الأول شفناه في التليفزيون من حوالي شهر قبل ما نروحلو

سعيد

بس فيه ناس قالوا لنا عليه كمان ، قمنا إتصلنا بعيادته وروحناله وأخذنا الوالدة معانا

حسن

بيعالج بثقب الأوزون

طلال

ياه، ثقب الأوزون،؟ مش ده اللي عليه مشاكل وكلام كتير؟

مصطفى

أيوه ، أنا بأسمع فعلاً في التليفزيون المذيعة بتقول على ثقب الأوزون وإننا لازم نعمل حاجة علشان ننقذه

طلال

ننقذه إيه يا إبني؟ هو عيل تايه؟ ده هو اللي عامل المشكلة والناس كلها بتشتكي منه

لم يستطع فتاوي الإكتفاء بالإستماع فقط إلى هذا الحديث المثيرعن الثقب وعن إستخداماته العلاجية وكان لزاماً عليه أن يستجيب لنداء الغريزة الطبية التي طالما صعب عليه مقاومتها ، كان لزاماً عليه أن يتدخل ويشارك بوجهة نظر على الأقل إن لم يكن بفتوى علاجية

فتاوي

هايل ، أنا كنت متأكد إن الثقب ده اللي الأجانب بيشتكوا منه ، هييجي واحد مصري فذ في يوم من الأيام ويلاقيلوا فايدة ، مصر دايماً ولادة للمخترعين والعظماء. لا مؤاخذة أنا دخلت في الحديث كده بس الكلام اللي إنتو بتقولوه مهم جداً ، أنا قرأت عنه قبل كده في الجريدة ، أنا أعرف مرضى كتير عندهم خشونة في مفاصلهم، إسمحوا لي أعرفكم بنفسي ، غاوي فتاوي بالمعاش ، وتقدروا تقولوا من أعمدة القهوة دي من زمان

سعيد

أهلاً إهلاً ً ، أنا سعيد بمصلحة الكهربا وده حسن أخويا برضه بمصلحة الكهربا وده مصطفى إبن خالتي بالسكة الحديد وده طلال.صديقنا من زمان ، قابلناه صدفة النهارده وبقى لنا سنين ما شوفناهوش

فتاوي

أهلاً وسهلاً… الحقيقة العلاج الجديد ده هيفيد آلاف المرضى

طلال

آلاف إيه يا أستاذ؟ قول ملايين ، ده الناس كلها عندها خشونة

فتاوي

أظن هو فيه منه أوزون أقراص وكمان أوزون لبوس. مش كده برضه؟

حسن

بالضبط.

مصطفى

بس على الله بقى ما يجيش واحد من الزعلانين من الثقب بتاع الأوزون يسدوا ويبوظ لنا العلاج الجديد

فتاوي

فعلاً فيه كلام كتير إنهم هيسدوا الخرم

طلال

ويسدوه ليه ؟ حرام ، ما يسيبوه ينفس عن الناس شوية ، دي الدنيا بقيت خنقة

سعيد

بس أكيد مصر مش هتسكت ومرضى الخشونة ومفيش أكتر منهم في الدنيا أكيد هيقلبوا الدنيا ، ده حتى الدكتور نفسه عنده خشونة في مفاصله

طلال

وعرفت منين؟

حسن

هو اللي قال في البرنامج وقال إنه جرب العلاج على نفسه أول واحد وخف في يومين إتنين بس ورجع دلوقتي يلعب مساكة مع ولاده ودومينو كمان بعد ما كان بطل يلعب مساكة ودومينو معاهم بقى له شهور

سعيد

إذا كنت هتروحلوا لازم تاخد موعد الأول ، الناس هناك أمم . ماهر إبن خالتي بيقوللي إن العيادة بتاعته كانت بتنش بس من ساعة ما الدكتور طلع في التليفزيون ما بقاش عارف يلاحق على المرضى

مصطفى

بس إزاي ما سمعناش في الجرايد عن الإختراع ده وعن الدكتور المصري اللي إخترعه؟

طلال

الجرايد يا عم مشغولة بالكلام عن الأمن المستتب وفرص العمل الكتيرة وإحصائيات معدلات التنمية

حسن

فعلاُ، أنا متهيألي إني عايش في بلد وبجيب كل يوم الجرايد بتاعت بلد تانية ، بس أبو مسعد بتاع الجرايد بيأكد لي إن الجرايد دي مصرية. لأن هو كمان بيتسئل نفس السؤال كل يوم واللي هو سألهم برضه أكدوا له إن الجرايد دي مصرية مية في المية

طلال

نرجع لموضوعنا ، ما قولتليش ، الست والدتك أخدت العلاج؟

سعيد

طبعاً أخدته ، أخدته من شهر تقريباً ، بس هو غالي قوي على فكرة

طلال

يا سيدي وماله ، هو فيه حاجة تغلى على ست الحبايب . طمني ، إتحسنت عليه؟

فتاوي

فعلاً ، طمننا على الست الوالدة

سعيد

والله مش عارفين

طلال

يعني إيه مش عارفين؟ إنت مش بتقول الراجل إتحسن عليه في يومين وحتى بقى يلعب أستغماية مع ولاده؟

سعيد

لأ، مش صحيح ، أنا ما قلتش كده خالص، إنت مش مركز معايا في الكلام يا طلال، أنا قلت إنه بقى يلعب مساكة مع ولاده

طلال

ماشي يا سيدي ، ولا تزعل ، مساكة ، أمك أخبارها إيه؟ إزاي مش عارفين إذا كانت إتحسنت على العلاج الجديد ولا لأ وعدى عليه ييجي شهر دلوقتي

سعيد

وإزاي هنعرف وهي في العناية المركزة وفي غيبوبة بقى لها ييجي شهر دلوقتي؟

طلال

يا نهار أسود، في العناية المركزة؟

فتاوي

ألف سلامة للست الوالدة

حسن

أصل بعد الدوا بيومين ، يعني في ميعاد التحسن على الدوا الجديد ، السكر علي و الضغط ضرب والحرارة عليت وجت لها دوخة

سعيد

وبعدين حسيت بهطهطة شديدة ومعاها زغتة ، روحنا نقلينها المستشفى على طول

طلال

وكمان هطهطة ؟ يا حلاوة ، يعني الدوا جاب لها مصيبة

حسن

لأ طبعاً ، بلاش التسرع ده يا أخي ، أنا ما أنكرش إننا شكينا في الأول برضه

سعيد

بالضبط ، وروحنا للدكتور وشرح لنا الله يجازيه خير كل حاجة وقال لنا كمان إنه واخد براءة إختراع

طلال

وده معناته إيه؟

حسن

معناته إيه يعني إيه؟ بيقوللك براءة ، براااأة ، واخد براءة ، مش عارف يعني إيه براءة؟

سعيد

معليش يا حسن ، إشرح له مش فاهم

حسن

لازم فيه ناس ولاد حرام ونفسيتها وحشة ما تحبش تشوف حد ناجح ، كانوا رفعوا عليه قضايا لما أهاليهم حصلتلهم مشاكل بالصدفة ، قضاء وقدر يعني ، بعد ما أخدوا العلاج بتاعه ، بس الحق ظهر والمحكمة نصفته وإديتلوه براءة

طلال

طمنتني ، الله يطمن قلبك ، يعني الدكتورينفع الواحد يحجز عنده عادي يعني؟ هألاقيه في العيادة؟

سعيد

بالضبط ، بس مهم جداً تروح في الميعاد وإلا مش هيشوفك

طلال

ده كلام، هأكون عنده طبعاً في الميعاد بتاعي بالثانية

فتاوي

موفق بإذن الله…

تعقيب وتعليق

لا يوجد تحليل يستخدمه الأطباء لتشخيص مرض خشونة المفاصل

تصيب الخشونة مفاصل معينة بالجسم وهي إما الركبتين أو الظهر أو الرقبة في أغلب الأحيان

يعتمد تشخيص مرض خشونة المفاصل على وصف المريض للأعراض وهي آلام تزيد في أثناء حركة المفصل المصاب وتقل مع الراحة وقد يستعين الطبيب ببعض فحوص الأشعة لتأكيد التشخيص ولتقييم شدة الخشونة

يعتمد علاج الخشونة في الأساس على تعليمات يعطيها الطبيب للمريض وبعض المسكنات عند اللزوم وجلسات علاج طبيعي أحياناً وأيضاً على عقاقير طبية تعمل على تنشيط الغضاريف بالمفصل

الخشونة مرض مزمن إلا أن الإلتزام بالتعليمات وبخطة العلاج قد يساعد على تضاؤل الأعراض بشكل ملحوظ ويستطيع الإنسان ممارسة حياته بشكل شبه طبيعي

الإذاعة المرئية وسيلة عظيمة لتثقيف المجتمع ونحن نكن لها كل التقدير والإحترام والعرفان بالجميل إلا أنه وللأسف الشديد أن المعلومات الطبية التي نحصل عليها من الإذاعة المرئية ومن وسائل الإعلام الأخرى لا يبدو أنها تخضع في مدى صحتها لأي نوع من أنواع الرقابة العلمية في بعض الأحيان ولذلك فإننا ننصح بالتعامل مع هذه المعلومات بالحذر إلى حد ما والتأني بعض الشئ وبإستشارة طبيب إستشاري متخصص مشهود له بالأمانة وبالخبرة (معاً) قبل إتخاذ أي إجراء علاجي مستند فقط إلى هذه المعلومات

Leave a Reply