عبده سوسيس

حكاوي الأستاذ غاوي فتاوي

 حوارات باللغة المصرية العامية بطلها الأستاذ غاوي فتاوي الذي يهوى التدخل في الطب
تتناول المعتقدات الخاطئة عن أمراض الروماتيزم يليها مقال تثقيفي لتصحيح هذه المعلومات

موضوع العدد: دور أجهزة الأشعة الحديثة في التشخيص
اجهزة الأشعة الحديثة لا تغني عن زيارة الطبيب ولا عن الكشف الطبي على المريض
لا يجوز القيام بعمل أي من هذه الفحوص إلا بناء على طلب الطبيب

 “الأوكازيون السنوي الكبير” ، “أسعار لا تقبل المنافسة” ، “زورونا مرة ومش هتبطلوا تزورونا كل مرة” ، “أسعار إنتحارية”… ولافتات أخري تجتذب الجمهور على جميع المحال بالسوق الذي إكتظ بالسيدات والآنسات الشغوفات بالتسوق وبعدد لا بأس به من الرجال المغلوب على أمرهم والمأسوف على جيوبهم الذين إصطحبتهم زوجاتهم و بناتهم ليشاركوهن متعتهن بالتنزه بين المحال والأسواق.

وقف الأستاذ فتاوي والأستاذ فهمي بجوار بائع الجيلاتي خارج أحد المحال الفدائية المنتحرة بتخفيضاتها الصيفية المزعومة ينتظران زوجاتهما الست زهرة والست أنعام اللتان طال غيابهما داخل المحل لأكثر من ساعة ونصف. وبعد أن إنتهي فتاوي وفهمي من تسوقهم هم أيضاً عند عربة الفيشار ثم عربة اللب والفول السوداني وأخيراً الجيلاتي ، وبعد أن إنتهى كل ما كان لديهم من الأحاديث والطرائف التي أمضوا وقتهم في تبادلها ، وقف الإثنان صامتان في ساحة السوق كتلميذين حكم عليهما ناظر المدرسة بالوقوف خارج الفصل عقاباً لهم على شغبهم بالفصل.

ومع طول الإنتظار لاحظ الأستاذ فتاوي أن زميله الأستاذ فهمي يحني ظهره إلى الأمام وقد بدت على وجهه علامات الألم أو عدم الإرتياح

فتاوي

مالك يا فهمي ، فيه حاجة بتوجعك؟

فهمي

ضهري شادد علي

فتاوي

سلامتك

فهمي

دي حكاية قديمة ليها سنين دلوقتي ، أنا قلتلها أنا ماليش في المشاوير دي. هي اللي دايماً تصمم آجي معاها، وأديك شايف النتيجة. نسيت أجيب معايا المسكن بتاعي. بأخذ حبة منه دايماً لما أروح مشاوير زي دي وبيبقى كله تمام

فتاوي

بس ده مش حل يا فهمي يا خويا ، إنت هتفضل عايش على مسكنات ؟

فهمي

ما هو أنا قلت كده برضه ، وعلشان كده كنت رحت لدكتور الروماتيزم السنة اللي فاتت .

فتاوي

طب وقال لك إيه؟

فهمي

قال لي إن دي في الأساس مشكلة في الفقرات وإن الحل إني أعمل تمارين لتقوية عضلات البطن والظهر

فتاوي

وما عملش ليك أشعة؟

فهمي

عمل لي أشعة إكس ، اللي هي الأشعة العادية

فتاوي

بس؟

فهمي

تقصد إيه؟

فتاوي

ما عملش لك أشعة بالرنين والصبغة

فهمي

لأ ، أخويا كان معايا وسأله فعلاً السؤال ده ، والدكتور قال له إني مش محتاج لأن الكشف الطبي ما فيهوش علامات تستدعي عمل الرنين

فتاوي

بقى ده كلام ده يا فهمي؟ ده إنت راجل مثقف وعارف إن العلم تقدم والتشخيص كله دلوقتي بقى بالكمبيوتر والأجهزة الحديثة

فهمي

ما هو أخويا حلمي برضه كان قال كده للدكتور والدكتور قال له إن الأشعات دي بتتعمل في حالات معينة حسب ما يتراآي للطبيب بعد أخذ التاريخ المرضي والكشف على المريض

فتاوي

يتراآي؟ حلوة قوي يتراآي دي

فهمي

بس أنا فعلاً لما بأعمل التمارين اللي الدكتور قال لي عليها وآخد باسط العضلات يومين تلاتة بأبقي كويس جداً

فتاوي

بس يمكن تكون محتاج عملية

فهمي

بأقولك أنا بأتحسن بتعليمات الدكتور

فتاوي

ولو….ممكن تكون محتاج عملية والأشعات الحديثة هي الطريقة الوحيدة اللي هتبين

فهمي

تفتكر كده؟

فتاوي

طبعاً، ولا إنت عايز تستنى لحد ما فجأة يجيلك شلل رباعي في يوم من الأيام؟

فهمي (مفجوعاً على مصيره)

رباعي؟

فتاوي

أو حتى جلطة في المخ…كل شئ وارد لو ما إتحركناش بسرعة علشان نلحقك

فهمي (منهاراً)

طب إنت شايف إيه يا فتاوي يا خويا؟

فتاوي

ما فيش غير حل واحد بس

فهمي (وقد إنفرجت أساريره بعض الشئ)

إلحقني بيه في عرضك

فتاوي

عبده سوسيس

فهمي

بس أنا مش هأقدر يا فتاوي آكل سوسيس دلوقتي بعد الفيشار والجيلاتي ، أنا معدتي مليانة ، وكمان أنا عايز حل لمشكلتي وبعدين نبقى نروح ناكل سوسيس وقت تاني عند عبده

فتاوي

عبده ده مش بتاع سوسيس

فهمي

أمال بتاع إيه؟

فتاوي

ده بتاع كله ، هو ده اللي هيشخصلك مشكلة ضهرك وبإذن الله ، بإذن الله هو اللي هيقولك إذا كنت محتاج عملية ولا لأ؟

فهمي

وده عيادته فين ده؟ ولو إني يا فتاوي يا خويا مش مستريح خالص لإسم الدكتور ده بس إذا كنت إنت مستوثق فيه ، نروح له وأمرنا لله

فتاوي

عبده سوسيس ما عندوش عيادة ، عبده سوسيس ما عندوش وقت علشان يفتح عيادة

فهمي

دكتور وما عندوش عيادة؟ إزاي دي؟

فتاوي

عبده سوسيس مش دكتور

فهمي

نعم؟

فتاوي

مش دكتور بالمعني اللي إنت عارفه

فهمي

أمال بيعمل إيه بالضبط؟ وهيشخصني إزاي إذا ما كنش دكتور.

فتاوي

عبده سوسيس ده صديقي من الإبتدائية ، طول عمره ملحلح و حرك ، شغال دلوقتي في مركز “صحتك بالدنيا” بتاع الأشعة

فهمي

أيوه أيوه ، بشوف إعلاناتهم في الشوراع في كل حته.

فتاوي

عبده بقى هو اللي يعرف يدخلك في كل أجهزة الأشعة الحديثة اللي عندهم في المركز ، أشعة رنين ، أشعة مقطعية ، أشعة حمرا ، أشعة تليفزيونية ، وحتي الأشعة المنوية ممكن يعملها لك

فهمي

ياه ، كل ده؟

فتاوي

ما هو علشان كده إحنا مسميينه عبده سوسيس

فهمي

مش فاهم !

فتاوي

فهمي و مش فاهم؟ حلوة دي….إنت عارف الفيلم العربي اللي فؤاد المهندس كان بيقول فيه إنهم إخترعوا في بلاد بره مكنة تدخل فيها الطور من الناحية دي وهو صاحي والمكنة تطلعه من الناحية التانية سوسيس؟

فهمي

أيوه، أيوه…ده كان في فيلم “عائلة زيزي”

فتاوي

عليك نور، أهه عبده بقى بيدخل المريض في الجهاز من دول من الناحية دي ، يطلع من الناحية التانية يالتقرير اللي فيه تشخيص حالته ولو كان محتاج عملية

فهمي

يا راجل

فتاوي

أمال…ده يمكن قدام شوية الأجهزة دي تشوفلك الطالع وتقولك قدامك سكة سفر بعد العملية وجايلك عقد عمل في البحرين

فهمي (وهو يضحك)

الله يريحك يا فتاوي ، خلينا نتأكد من موضوع العملية الأول وبعدين نبقي نشوف سكة السفر بعد كده

تخرج الست الزهرة وصديقتها الست أنعام من المحل وفي يد الست أنعام كيس صغير جداً وقد بدت عليهما علامات البهجة والسعادة بعد أكثر من خمس ساعات من التسوق

فهمي

أخيراً

الست أنعام

الحمد لله ، أخيراً بعد شهرين لف في المحلات إشتريناه ، زيزي كانت هتزعل قوي لو كنا رجيعنا من غيره

الست زهرة

يا عيني ما عندهاش وقت قبل الفرح وشهر العسل بعد الفرح بيوم واحد بس

الست أنعام

واللون يا زهرة، اللون يجنن ، هينطق عليها

الست زهرة

فيه حاجة تانية يا أنعام عايزه نلف وندور عليها؟

الست أنعام

لا يا حبيبتي ، ما نحرمش منك أبداً، هو ده بس اللي أنا كنت نازله علشانه لما قالولي إنه بيتباع هنا

أثار هذا الحديث فضول فهمي وفتاوي بشدة خاصة وأن حجم الكيس الذي إشترته الست أنعام بعد قضاء نصف يوم كامل بالسوق لا يتناسب بالمرة مع شعورالسيدتين بكل هذا الإنتصاروالإنجاز….

فهمي

هو إيه ده اللي إنتو عمالين تدوروا عليه بقى لكو شهرين وزيادة؟

الست أنعام

بندور يا سيدي على مايوه لزيزي

فهمي (ممتعضاً)

مايوه؟ ما هي المايوهات مالية البلد

فتاوي (ممتعضاً هو الآخر)

أيوه فعلاً ، المايوهات ماهي مالية البلد

الست زهرة

بس زيزي طالبة مايوه معين ما تلاقيهوش في أي مكان

الست أنعام

أيوه

الست زهرة

ويمكن ما تلاقيهوش أصلاً كمان

فهمي

ليه بقى؟

الست أنعام

أصلها يا سيدي طالبة مايوه بكيني خمس قطع….

نظر فهمي و فتاوي لبعضهما وقد بدت على وجهيهما مجموعة من الأحاسيس لا داعي للدخول في تفاصيلها وعندما شعر فهمي أن وعكته الصحية بأسفل الظهرسوف تزاملها سكتة قلبية وشيكة ، آثر أن يتناسى كل ما له علاقة بالمايوه وبعدد قطع المايوه وأن يكتفي بآلام الظهر ، فابتسم إبتسامة عريضة لا تخلو من بعض البله الذي قد يحمي القلب أحياناً وهو يوجه حديثه لفتاوي

فهمي

خلاص يا فتاوي ، مش هأفكرك بقى تاني. شوف لنا أول فرصة علشان نروح نقابل عبده سوسيس ونخش المكنة

الست أنعام والست زهرة

سوسيس؟ مكنة؟

لم يلتفت لهما فهمي وفتاوي وتابعا حديثهما معاً….

فتاوي

ما يكونش عندك فكرة أبداً يا فهمي يا خويا…إحنا ندخلك في المكنة دي ونطمئن عليك وفي يوم من الأيام نبقى ندخل اللي في بالي واللي في بالك في مكنة فؤاد المهندس…قول يا رب

فهمي

ياااااااارب….

 تعليق

التشخيص الطبي والأشعات الحديثة

يعتقد الكثير من المرضى والعامة أن الطريقة المثلى والأكثر دقة للحصول على التشخيص الطبي الصحيح هي القيام بعمل الفحوص المعملية الدقيقة أو الأشعات الحديثة مثل الأشعة بالرنين مثلاً. ومن الطريف أن يجد الأطباء بعض المرضى يصرون على قيام الطبيب بطلب الفحوص والأشعات لهم بدلاً من وصف أعراضهم له وقيامه بالكشف الطبي عليهم ، ولهؤلاء المرضى نقول:

أولاً: ألأساس في تشخيص المريض هو مقابلة الطبيب ووصف الشكوى له والإجابة على الأسئلة التي يستوضح بها الطبيب تشخيص المريض
ثانياً: يقوم الطبيب بطلب الفحوص إذا رأى حاجة إلى ذلك وهو الذي يقوم بنفيه بطلب الفحوص اللازمة سواء كانت فحص معملي أو أشعة
ثالثاً: الإجتهاد الشخصي والقيام بعمل فحوص دون إستشارة طبيب غالباً ما يؤدي إلى تعقيدات قد تعيق المريض عن الحصول على الرعاية الطبية المثلى وذلك لأسباب عدة أهمها أنه إذا حصل المريض على نتيجة تحليل ما خارج المعدل الطبيعي مثلاً فإن الفيصل هنا في التعامل مع هذا التحليل هو كيف يقوم طبيب متمكن من علمه بترجمة هذه النتيجة ففي بعض الأحيان قد لا تكون لها أهمية إكلينيكية ولا أي علاقة بشكوى المريض.

Leave a Reply