عشرين دكتور في عشر شهور

حكاوي الأستاذ غاوي فتاوي

حوارات باللغة المصرية العامية بطلها الأستاذ غاوي فتاوي الذي يهوى التدخل في الطب
تتناول المعتقدات الخاطئة عن أمراض الروماتيزم يليها مقال تثقيفي لتصحيح هذه المعلومات

في هذا العدد: نصائح هامة لمرضى الروماتويد المفصلي

إنطلق سندي بسيارته السيات 133 والمزودة بأحدث أنواع التكنولوجيا وكماليات السيارات والتي كان سندي شغوفاً بتزويدها إياها من زجاج كهربائي وجي بي إس و باور وتربو وعتب جانبي، إنطلق بسيارته الصغيرة الشهيرة بين أصدقائه بلقب “يوضع سره في أضعف خلقه”، مصطحباً صديقه فتاوي إلى عيادة الدكتور فريد دكتور الروماتيزم . سندي مريض بمرض الروماتويد (الروماتويد مرض يؤدي إلى حدوث إلتهاب مزمن بالمفاصل) وهو يقوم حالياً بجولة ميدانية تشمل عيادات جميع أطباء الروماتيزم أملاً في إكتشاف الدكتور الفذ الذي سيقضي على الروماتويد نهائياٌ بحقنة واحدة وهي فتوى كان قد حصل عليها سندي من أحد منتديات المرضى على الإنترنت وما أكثر ما يحصل عليه المرضى من خلال هذه المنتديات من فتاوي غريبة وأوهام ليس لها أي أساس علمي

جلس فتاوي المسكين بجوار سندي السائق المتهور والمنطلق بسرعة جنونية بعربته الطائشة يتصبب عرقاً من الخوف ، وبعد صمت طويل وتردد بدأ يتلعثم ببعض الكلمات في محاولة للتعبيرعن الهلع الذي يشعر به بسبب قيادة سندي …

فتاوي

عـ..عـ..على فكرة فيه فرق كبير بين قيادة السيارة ولعبة البلاي ستيشن

سندي

تقصد إيه؟ مش فاهم حاجة

فتاوي

أقصد يا ريت تسوق على مهلك شوية

سندي

إنت خايف ولا إيه؟ (ويخفف من سرعته قليلاً وينظر لفتاوي) ده إنت راكب الوحش

فتاوي

يا سلام ، طب إديني أمارة، أنا لو مكانك ما أنزلش بالبسكليته اللي إحنا راكبنها دي من على الرصيف لحسن عربية تخبطتني

سندي

لألأ، خد بالك ، أنا عربيتي حساسة وممكن تاخد على خاطرها منك

ثم ينطلق صوت طنين من تابلوه السيارة ويتكرر بشكل متقطع ليشبه صوت أجهزة التلغراف التي كانت تستخدم في الستينات ويعقبه صوت مزعج حقاً يشبه تماماً صراخ صفارة الإنذار التي كانت تحذر الناس من الغارات أيام الحرب العالمية حتى يختبؤا في مداخل العمارات والخنادق

فتاوي (مفزوعاً)

إيه ده ، هي عطلت تاني؟ أنا تعبت، مش هانزل أزق تاني

سندي

ما عطلتش ولا حاجة، العربية زي الفل ، وكل شئ على ما يرام

فتاوي

أمال إيه الصوت ده كمان؟

سندي

ده يا سيدي جهاز الجي بي إس

فتاوي

إيه…باظ؟ حصل فيه ماس كهربائي؟ مسكت فيه نار؟ أكيد فيه مشكلة ، إنت مش سامع الأصوات اللي بيعملها

سندي

لأ يا سيدي، الحكاية وما فيها إنه بيقول لنا بالصوت الأولاني إن إحنا وصلنا شارع الزهراء نمرة خمسة اللي هو يعني عيادة الدكتور

فتاوي

طب والصوت التاني؟ صوت الحمار اللي بينهق ده؟

سندي

ده معناه “حمدل على السلامة” بس بلغة الجي بي إس ، أصل كل حاجة هنا عندي بالأصوات والشفرات، إتفضل إنزل علشان نطلع عيادة الدكتور

فتاوي

فعلاً يوضع سره في أضعف خلقه…

سندي

إنت بتقول حاجة؟

فتاوي

لا أبداً ، أنا بس بفكر ليه شركة بي إم دبليو ما ياخدوش الأفكار دي من سيادتك علشان يطوروا عربياتهم هما كمان

وفجأة تنطلق من موتور السيارة “يوضع سره في أضعف خلقه” ثلاث أصوات فرقعة كفرقعة البمب في العيد ، فينبطح فتاوي أرضاً واضعاً يديه على رأسه وقد إنتابه رعب شديد في البداية

فتاوي

في إيه يا سندي؟ إيه الإنفجارات دي؟

سندي

ده جهاز الرادار حضرتك

فتاوي

كمان رادار؟ هو إحنا هنحارب خلاص؟

سندي

بيقول إن فاضل ثلاث عيانين عند الدكتور وبعدين ييجي الدور بتاعنا ، أمال ، كل حاجة هنا مظبوطة بالفستو ثانية

يجلس سندي وفتاوي في العيادة حتى يفرغ الطبيب من الثلاث إنفجارات أو الثلاث مرضى المتبقيين ثم يدخل الإثنان معاً للدكتور

سندي و فتاوي معاً

مساء الخير يا دكتور

دكتور فريد

مساء النور ، أهلاً وسهلاً، إتفضلوا إستريحوا، خير إيه المشكلة؟

سندي

مفاصلي يا دكتور، مفاصل صوابعي بتوجعني وبتتورم وما بقدرش أحركها بالذات الصبح لما أقوم من النوم ، ومفاصل القدم كمان فيها نفس المشكلة

دكتور فريد

بقى لك أد إيه بتشتكي من الأعراض دي؟

فتاوي

عشر شهور دلوقتي يا دكتور

دكتور فريد

ومكشفتش طول المدة دي عند ولا دكتور روماتيزم؟

فتاوي

لأ إزاي ، كشف طبعاً يا فندم ، أنا اللي كنت بوجهه بنفسي من ساعة ما بدأ المرض ، ده حتى في الأول كان عايز يكشف عند دكتور عظام بس أنا اللي وضحت له إن آلام المفاصل تتبع تخصص الروماتيزم ، وكان مستغرب وفاهم إن دكتور روماتيزم يعني الدكتور اللي بيعالج الناس الكبيرة في السن فقط

دكتور فريد

للأسف الشديد يا أستاذ إن زي ما سعادتك تفضلت ، معظم الناس فاهمه إن دكتور الروماتيزم بيعالج مرض إسمه “الروماتيزم” بييجي لكبار السن

فتاوي

رغم إنه كلمة روماتيزم معناها فقط آلام بالمفاصل أو بالجهاز الحركي

دكتور فريد

مضبوط سعادتك، هو كده بالضبط ، كلمة روماتيزم معناها فقط آلام بالمفاصل أو بالجهاز الحركي بصفة عامة. لا يوجد مرض إسمه روماتيزم أصلاً. كل الحكاية إنه بدل ما يبقى إسم التخصص “أمراض المفاصل” أو “أمراض الجهاز الحركي” وهو الوصف الصحيح لهذا التخصص ، جرى العرف أن يطلق عليه إسم “تخصص الروماتيزم” وهو ده اللي خلى الناس تتلخبط لأن كلمة روماتيزم بالنسبة للعامة زي ما كلنا عارفين “راجل عجوز مفاصله بتوجعه”

سندي

أنا أول مرة أعرف الكلام ده كانت لما تعبت بمفاصلي السنة دي.

فتاوي

لما قلت له لازم يروح لدكتور روماتيزم قال لي ليه هو إنت شايفني عندي تمانين سنة

دكتور فريد

المهم إقتنع في الآخرإنه يروح لدكتور روماتيزم لما ظهرت الأعراض دي من عشرشهور؟

سندي

إقتنعت وبس؟ ده أنا إقتنعت لدرجة إني في عشر شهور رحت لأكتر من عشرين دكتور روماتيزم

دكتور فريد (مبتسماً ومستنكراً في نفس الوقت)

يبقى أنا كده عرفت مصيري أنا كمان إلى حد كبير… وإيه بقى اللي بيخليك تغير الدكتور بتاعك كتير كده يا أستاذ سندي؟

سندي

الألم يا دكتور..الألم اللي في مفاصلي…ما فيش حد حاسس بيي… ما حدش حاسس بالمعاناة اللي أنا فيها… حتي في الشغل مديري فاكرني ببالغ أو بددلع…. أنا يا دكتور ساعات كوباية الميه ما ببقاش قادر أرفعها علشان أشرب ، فيه يا دكتور أيام مراتي لازم تساعدني علشان ألبس هدومي (إنفعل سندي وزرفت دمعتان من عينيه)

فتاوي

هدي نفسك يا سندي… إحنا جايين نعيط ولا نتعالج؟

سندي

الإتنين (ثم يوجه كلامه للطبيب مرة أخرى) كل ما أسمع عن دكتور يقولو عليه إنه كويس أروح واخد بعضي ورايح له وآخد العلاج اللي يوصفهولي لكن لما ما ألاقيش معاه تحسن ، أبطل العلاج وأروح لدكتور غيره ، يقوم يكتب لي تقريباً نفس العلاج برضه، كل الدكاتره قالولي إن عندي روماتويد، لكن معقولة ما فيش علاج بيحسن المرض ده؟ فكرت أسافر بره لكن واحد مريض إبن حلال إتعرفت عليه في عيادة دكتور مشهور قال لي إنه سافر بره كتبوا له نفس العلاجات وإنه في النهاية إتحسن بس لما واظب على العلاجات لعدة أشهر

دكتور فريد

طب ما إنت عارف الحل بتاع مشكلتك أهه يا سندي

سندي

تقصد إيه حضرتك؟

دكتور فريد

الإنتظام على العلاج اللي الدكتور يوصفه لك

سندي

والآلام يا دكتور اللي ما بتروحش؟

دكتور فريد

إنت محتاج شوية صبر يا سندي وكل حاجة هتبقى تمام ، محتاج تعرف إن المرض ده مزمن والتحسن بيحصل بالتدريج على مدى أسابيع أو بمعني أصح شهرين على الأقل ده طبعاً على إعتبار إنك منتظم في تعاطي الأدوية

سندي

إهى دي الحاجة اللي أنا عمري ما عملتها

فتاوي

إعملها بقى دلوقتي يا سندي

سندي

ما فيش حد قال لي إن العلاج ياخد على الأقل شهرين علشان يبدأ يعمل مفعول غير زميلي مريض الروماتويد اللي إتعرفت عليه في العيادة بتاعة الدكتور…مش كان المفروض برضه الدكتور هو اللي يقول لي ويشرح لي الحكاية دي ولا يعني أروح أعرفها من الغريب

فتاوي

المهم إنك عرفتها وإنت في عيادة الدكتور وخلاص ، تيجي بقى من الدكتور أو التمرجي بتاعه أو العيان بتاعه ، مش لازم تدقق يا أخي، ما عرفتهاش وإنت عند الحلاق مثلاً

سندي

يا سلام

دكتور فريد (مبتسماً)

سندي عنده حق…للأسف إحنا ساعات بسبب ضغط الشغل بننسى نوضح معلومة هامة للمريض زي مثلاً إن العلاج بطئ وياخد عدة أسايع علشان يعمل مفعول ، مرضى كتير لو مش عارفين معلومة مهمة زي دي هيروحوا يوقفوا العلاج بعد أسبوعين أو تلاتة بالكتير

سندي

بالضبط يا دكتور، هو ده اللي كان بيحصل بالضبط

دكتور فريد

وفيه حاجة تانية مهمة كمان ساعات إحنا الدكاترة للأسف برضه بننساها

سندي

إيه هي يا دكتور؟

دكتور فريد

كتير ييجي مريض روماتويد ونوصف له علاج ونقول له ييجي بعد شهرين علشان نتابع حالته ، يقوم لأي سبب لو إتعطل وجه بعد شهرين ونص أو تلاتة  يروح يبطل العلاجات الموصوفة له بعد شهرين وييجي يقول لنا العلاجات أخذتها زي ما هي موصوفة لي ووقفتها بعد شهرين بالضبط زي ما حضرتك قولت… إحنا لما نقول للمريض ييجي بعد شهرين بنقصد متابعة للحالة وليس الإنتهاء من العلاجات ، علشان كده دايماً أقول للمريض تعالى بعد شهرين ولو لأي سبب إتعطلت وعدى حتى أربع شهور لحد ما تييجي ، العلاجات بتاعتك مستمرة ، يعني تخلص تتكرر ، وإحنا لما نشوفك هنقوم بتعديلات أو تغييرات في هذه العلاجات حسب تقييمنا للحالة ولتطورها

سندي

الله ينور عليك يا دكتور، يا ريت حد كان شرح لي الكلام ده من زمان….

فتاوي

فعلاً دي معلومات قيمة جداً وتهم كل مريض روماتويد

سندي

دكتور بعد إذن سعادتك كنت برضه عايز أسأل في حاجة تانية كمان…فيه مرة أخذت علاج وعمل لي أعراض جانبية

دكتور فريد

وقال لك إيه الدكتور لما رحت له تقول له إن جت لك أعراض جانبية من العلاج؟

سندي

لا ما أنا ما رحتلوش تاني بقى

دكتور فريد

ليه بس يا سندي، أهي دي غلطة تانية مرضى كتير بتعملها، الأعراض الجانبية لأي علاج مش ذنب الدكتور وممكن تحصل لأي مريض ، لكن الدكتور دايماً عنده الحل الأمثل للتعامل مع هذه الأعراض

فتاوي

بالضبط ، هو اللي هيوقف لك الدوا

دكتور فريد

مش شرط ، فيه طرق مختلفة للتعامل مع الأعراض الجانبية إذا حدثت بسبب تعاطي علاج معين ولازم ما ننساش إن أهم حاجة إن الدكتور هو اللي يقرر أصلاً إن الأعراض اللي بيشكو منها المريض دي أعراض جانبية بسبب العلاج…أقولك نصيحة  تعتبرها أهم وصفة للتعامل مع الدكاتره لو عندك المرض ده؟

سندي

إتفضل يا دكتور…ده أنا أصلاً جاي لحضرتك علشان كده

نصائح لمريض الروماتويد عن المتابعة مع طبيب الروماتويد

دكتور فريد

تابع مرضك مع طبيب واحد ترى أنه كفء وقادر على متابعة حالتك ولا تقوم بالتسوق في عيادات الأطباء ولا تستشير طبيب آخر إلا إذا تراءى لك أن هناك سبباً وجيهاً فعلاً لذلك. وللعلم فإن علاج الروماتويد يعتمد على مجموعة من التوصيات والعقاقير المتفق على إستخدامها لعلاج هذا المرض عالمياً ولو إختلف طبيبان روماتيزم في نوع العقار الذي سيوصفانه لعلاج مرضك فهو إختلاف ثانوي أو بمعنى آخر مثلاً إختلاف في ترتيب إستخدام العقار(أ) والعقار (ب) ليس أكثر وليس إختلاف جذري في طريقة علاج المرض

سندي

تمام….

دكتور فريد

ولا تتســرع

فتاوي

آه والله يا ريت يا دكتور تقول له ، ده بيجري جري بالعربية ، كنا هنعمل حادثتين وإحنا جايين لحضرتك في الطريق ، وقعدت أقول له أنا كمان مريض الروماتويد لازم يسوق بشويش

دكتور فريد

لأ حضرتك أنا ما قولتش لا تسرع ، أنا قولت لا تتسرع ، يعني مثلاً يعني إذا وصف لك الطبيب عقار وعانيت من أعراض جانبية بسبب تعاطيه أو لم تتحسن حالتك ، فأول ما يجب أن تفعله في هذه الحالة هو أن تستشير طبيبك مرة أخرى حتى يقوم بالنصيحة أو الإجراء الطبي اللازم بدلاً من أن تتسرع في استشارة طبيب آخر ، فحدوث الأعراض الجانبية أو عدم تحسن المريض على علاج معين هي أشياء تحدث غير قليل مع أكثر الأطباء كفاءة وحدوثها لا يعني أن تسارع لإستشارة طبيب آخر.

فتاوي

تمام…هايل… بس ده برضه ما يمنعش إنه يسوق على مهله علشان حتى يوصل بيته بالسلامة

سندي

حاضر يا أستاذ فتاوي…

Leave a Reply