الواد اللي إسمه عادل

حكاوي الأستاذ غاوي فتاوي

حوارات باللغة المصرية العامية بطلها الأستاذ غاوي فتاوي الذي يهوى التدخل في الطب
تتناول المعتقدات الخاطئة عن أمراض الروماتيزم يليها مقال تثقيفي لتصحيح هذه المعلومات

في هذا العدد: نصائح هامة لمرضى خشونة الركبة

لا ينصح بتعاطي العقاقير المسكنة قبل البدء في المشي أو القيام بالتريض
لا يجوز إتباع تعليمات إلا من الطبيب المختص

 

قام الأستاذ عبد القوي بالإشتراك مؤخراً بصالة كمال الأجسام في محاولة جادة هذه المرة لإستعادة ما يمكن إستعادته من شبابه وأيضاً للمساعدة على التخلص من عادة التدخين. وكان من الضروري طبعاً أن يبحث لنفسه عن مدرب متمكن يشرف على برنامج إستعادة الشباب الذي بدأه منذ أربعة أيام وكان المرشح الوحيد لهذه العملية هو الكابتن سوكة الذي تشرف بالتعرف عليه أمس فقط فهو المدرب الوحيد بهذه الصالة ومتواجد بها يومياً من الصباح إلى المساء لا يتركها إلا أوقات الغذاء وأوقات التنفيس عن نفسه بسيجارة أو سيجارتين …

كابتن سوكة

إنت دلوقتي راجل رياضي ، لازم تمشي على نظام غذائي بتاع الرياضيين

الأستاذ عبد القوي

ومين سعادتك اللي ممكن يساعدني أحصل على النظام الغذائي الرياضي

كابتن سوكة

محسوبك ، أنا بلا فخر دربت معظم أبطال العالم المعروفين في كمال الأجسام وكنت المسئول عن نظام تغذيتهم كمان، إنت في أي نادي بس إسأل على كابتن سوكة

الأستاذ عبد القوي

سوكة…كابتن سوكة

كابتن سوكة

أنا بلا فخر يا حضرت طلعت كل أبطال مصر المعروفين، أنا اللي دربت الشحات مبروك و على زؤو وسيدهم اللي كايدهم وعادل فتلة و …

الأستاذ عبد القوي

عادل فتلة؟

كابتن سوكة

أيوه ، ما هو ده اللي كان الأستاذ محمد فوزي جابله الدكتور في الأغنية

الأستاذ عبد القوي

لا مؤاخذه ، مش واخد بالي حضرتك تقصد إيه بالضبط

كابتن سوكة (وبدأ كابتن سوكة بصوته القوي النبرات الصادر من أحشاء كرشه الضخم يغني)

عارف الواد اللي اسمه عادل جه الدكتور وعمله إيه؟

لقى رجليه بقو زي الفتلة، بص شوية جوه عنيه

راح إدالو حقنة كبيرااااااا

الأستاذ عبد القوي

أيوه أيوه ، هو ده بقى عادل اللي حضرتك تقصده

كابتن سوكة

صعب علي الولد ، رحت إتبنيته بعد ما أخد الحقنة على طول وأشرفت على تمرينه وعلى تغذيته بنفسي وأنا اللي كنت بأجيبله اللبن الصبح كل يوم في الأغنية لحد ما أصحابه بطلوا يضحكوا عليه ، بإختصار كده أصبحت أبوه الروحي

الأستاذ عبد القوي

ما شاء الله

كابتن سوكة

بس طلع روحي… في الأول بس،،،، ما كانش بيرضى ياكل خالص في الأول ، أمال هو الأستاذ محمد فوزي الله يرحمه تعب معاه من شوية ، آخر ما زهق قالي خده إنت يا سوكة إتصرف معا، ما حدش هيعرف ياخد باله من الولد المتعب ده غيرك إنت

الأستاذ عبد القوي

ما شاء الله يا كابتن سوكة ، دي حاجة عظيمة خالص…

كابتن سوكة

ده غير الأبطال العالميين طبعاً ودول كتير أوي (و يخرج من محفظته صورة له مع أحد الأبطال والتي كان من الواضح أنها من إخراج أحد مبدعي الفوتو شوب وما أكثرهم) ، دي مثلاً صورتي مع أحد تلامذتي اللي ربنا فتح عليهم دلوقتي من وسع

الأستاذ عبد القوي

(ينظر إلى الصورة) ده أرنولد شوارزنيجر

كابتن سوكة

عليك نور، أنور شلاميجر …أهو ده بقي حبيبي ، ورغم أنه إتشهر ما شاء الله في أمريكا وطلع في السيما وبقى عمدة البلد هناك ، بس ما يقدرش ياخد قرار غير لما يرجع لي ، كل يومين تليفون…أيو يا كابتن سوكة ، الواد تعبني أوي في الدراسة ، أعمل إيه؟ …بعد يومين تليفون ، أيو يا كابتن سوكة ، فيه أزمة أيس كريم عندنا في كاليفورنيا، أعمل إيه، …بعد يومين تليفون ، أيو يا كابتن سوكة ، المدام زعلت تاني وراحت عند أمها…

الأستاذ عبد القوي

والله أنا سعيد بمعرفتك يا كابتن سوكة

كابتن سوكة

أنا أسعد يا فندم

الأستاذ عبد القوي

يعني على كده حضرتك تقدر تساعدنا في عمل برنامج رياضي لإتنين زمايلي هييجو إنهارده الجيم أول مرة؟

كابتن سوكة

أنا خدامك يا فندم ، أنا تحت أمرك

الأستاذ عبد القوي

هما في الحقيقة مش شباب قوي ومش عواجيز قوي ، يعني أواخر الخمسينات كده ، وواحد منهم عنده آلام في ركبته من أكتر من شهر وبيزك عليها…

كابتن سوكة

دي لعبتي ، دي هي دي…

يظهر فتاوي وصديقه عوض أفندي في صالة كمال الأجسام

الأستاذ عبد القوي

أهم وصلوا أهم

يتعارف سوكة و فتاوي وعوض أفندي ويبدأ الجميع بحماس في التخطيط لمستقبلهم الرياضي

عوض

أهم حاجة عندي إن الوجع بتاع ركبتي ده يروح ، الصيدلي كتب لي مسكن بس بيريح الوجع ساعتين أو تلاتة بس وبعدين يرجع زي الأول…

عبد القوي

إنت مش كنت رحت للدكتور يا عوض؟

عوض

لا ما هو أصل الحكاية

فتاوي

ما تقلقش يا عبد القوي ، ما إحنا عارفين من السنة اللي فاتت إن عنده خشونة في ركبته. هو يعني الدكتور هيقولوا إيه غير إن الخشونة مالهاش علاج ويكتبله شوية مسكنات ويقوله يلا حسن الختام، لازم يقاوم المرض لحد ما يقضي عليه بنفسه

سوكة

يالضبط ، عفارم عليك يا أستاذ

فتاوي

إفتكر يا عوض دايماً ، العزيمة ثم العزيمة ثم العزيمة

عوض

بس الوجع بيبقي شديد لما أمشي أكتر من خمسين متر

سوكة

خد مسكن ، أمال هما عملو المسكنات ليه

ويبدأ برنامج الصحة والشباب للأستاذ عوض بصعوده إلي جهاز الممشى الكهربائي بناء على نصيحة سوكة وفتاوي ويبدأ عوض في المشي وهو تحت تأثير المسكن فبدت خطواته شبه طبيعية في البداية إلا أنه سرعان ما بدأ يتباطأ تدريجياً بعد مرور عشر دقائق فقد بدأ يعاني مرة أخرى من الآلام بالركبة وأخذت هذه الآلام تتزايد شيئاً فشيئاً إلا أنه بذل كل ما في وسعه كي لا يتوقف و ذلك تحت تأثير الشعارات والهتافات الحماسية لسوكة وفتاوي والتي لم يواجهها ما ينصف هذا البائس المتألم سوى تعاطف عبد القوي الصامت لعملية تعذيبه بجهاز الممشى الكهربائي

فتاوي

لازم تقاوم المرض

سوكة

يا تغلب المرض ، يا المرض يغلبك

فتاوي

إدي ، إديله ، إدي ، إديله…

سوكة

إديني أكتر….أكتر…أكتر

ظل عوض “يديني أكتر…أكتر” معتقداً أنه في مضمار الصراع مع مرض خشونة الركبة والذي سيخرج منه ، رغم كل هذه الآلام ، منتصراً إذا تحمل وثابر أكثر من ذلك….وظل يثابر ويثابر إلى أن سقط على الأرض من شدة الألم وتم نقله إلى مستوصف طبي حيث أشرف على علاجه طبيب روماتيزم متخصص قام بوصف العقاقير اللازمة له وبإعطائه هذه النصائح:

نصائح لمرضى خشونة الركبة

  • المشي العلاجي هو فقط المشي الغير مصاحب بألم: الحركة أو المشي من أهم ما يساعد على تحسن آلام الركبة بشرط ألا يكون المشي مصحوباً بألم ، فإذا كنت مثلاً تستطيع أن تمشي مائتي متر تقريباً فقط (ثمانية دقائق) بدون ألم ثم تبدأ الآلام بالركبة بعد ذلك ، فإننا ننصح بعدم المشي لأكثر من خمسة دقائق فقط ثم تستريح على أن تكرر هذه الخمسة دقائق عدة مرات يومياً ، أما إذا صمم المريض على المشي في هذه الحالة مثلاً لأكثر من عشرة أو خمسة عشر دقيقة ظناً منه أنه بذلك سوف يقاوم المرض ويهزمه ، فإن الشئ الوحيد المؤكد في مثل هذه الحالة أنه في خلال يومين أو ثلاثة لن يتمكن من المشي لأكثر من دقيقة واحدة وسوف تتدهور حالته.

  • لا ينصح أبداً بتعاطي المسكن قبل البدء في المشي أو القيام بمجهود قد يزيد من آلام الركبة لأن المسكن في هذه الحالة سوف يحجب الألم والألم رغم أنه شعور غير مستحب طبعاً للإنسان إلا أنه في نفس الوقت وسيلة هامة لإدراك الخطر أو المرض في مكان ما بالجسم (الركبة في هذه الحالة) مما يؤدي بالإنسان إلى الإمتناع عن الحركات أو النشاط الذي يؤدي إلى الألم وإلى زيادة الأعراض و إلى حدوث المضاعفات

Leave a Reply